Кузнечиха тарихын сөйләде

2018 елның 29 ноябре, пәнҗешәмбе

Кузнечиха урта мәктәбенең җиденче класс укучысы Ләйсән Нуруллина “Борынгы Биләрдәге яшьлек” республика фәнни-гамәли конференциясендә җиңүче булды.
Алексеевск районының Биләр урта мәктәбе базасында уздырылган конференциядә тарих укытучысы Лариса Пашина да катнашты. Ул “Колбецкийларның дворян нәселе” проект-тикшеренү эшләре җитәкчесе, конференциядә Ләйсән әлеге проект белән (“Минем Ватаным биредән башлана” секциясе) таныштырып үтте. Кузнечиха авылы җирләренең хуҗасы булган Колбецкийлар гаиләсе турында да сөйләде.
Ә инде Лариса Владимировна укытучылар һәм өстәмә белем бирү педагоглары секциясендә тикшеренү эшләрен оештыру тәҗрибәсе белән уртаклашты. Моның өчен аңа конференциядә катнашучы сертификаты һәм кызыксындыру призы тапшырылды.