Игенчеләр басуга чыгарга әзер

 

 

Никольск механизаторларына бу язда шактый күләмдә эш башкарырга туры киләчәк. Биредә эшкәртелергә тиешле мәйданнарның күләме 1100 гектарга якын. Коллективтагы һәр кеше алдына алдан ук конкрет бурычлар куелган.

 

Шунысын әйтергә кирәк, бурычлар үтәмәслек түгел. Моңа кадәр биредә бер генә басуның да чәчелми калганы юк, үстерелгән уңышны  ел саен бөртеген дә әрәм итми җыеп алалар. Игенчеләр һәм механизаторлар көн үтсенгә генә дип йөрми, тапшырылган һәр эшне намус белән башкарып чыгарга тырышалар.Тагын бер мөһим нәрсә турында әйтергә кирәк: хуҗалыкта һәркем үз эше өчен җавап бирә.

 

Хуҗалыкта көпчәкле тракторларның күбесен һәм туфрак эшкәртү агрегатларын көздән үк тиешенчә төзәтеп куйганнар. Беренче мартта исә механизаторлар җиң сызганып калган техниканы әзерләүгә керешкән.

 

– Язын да мәшәкатьләр җитәрлек, – ди хуҗалык җитәкчесе Андрей Синицин. – Техника сынатмыйча эшләргә тиеш, шуңа күрә, басуга чыгар алдыннан барлык машиналарны да җентекләп тикшерәбез.Һәркем үз техникасының төзеклеге өчен җавап бирә. Шөкер, моңарчы бер генә тракторның да кыр уртасында ватылып калганы булмады...

 

Тырма, культиватор һәм чәчкечләрне әзерләүдә катнашкан Александр Сорокин, Валерий Николаев, Сергей Сомов, Ришат Вәлиуллинның осталыгына сокланмый мөмкин түгел. Егетләргә бу җаваплы бурычны ел саен ышанып тапшыралар. Моңа кадәр аларның гаебе белән техниканың сынатканы булмаган. Быел да тагылма агрегатларны вакытыннан алда төзәтеп бетергәннәр.

 

Язгы басуда К-700, К-701, Т-150 кебек куәтле тракторлар, шулай ук МТЗ-80 һәм йөк ташуга көйләнгән КамАЗ автомобиле тулы көчкә эшләргә тиеш. Елның-елында диярлек бу төр техникага гектар күләме күбрәк туры килә. Димәк, машиналарны җаваплы чорга ныклап әзерләргә кирәк. Ринат Зариповка, мәсәлән, быел да бөртекле культуралар чәчү бурычы йөкләнгән. Тәҗрибәле механизаторларның берсе буларак, күптән түген генә сатып алынган Т-150 тракторын ышанып тапшырганнар. Дөрес, трактор яңа түгел, капиталь ремонт узган, шуңа да карамастан, ерактан ук матур булып күренеп тора. Ә менә аның тракторына тагылган СУ3Т-4 чәчү агрегаты  өр–яңа, завод буявы аңкып тора. Лаеш осталары ясаган бу чәчкечне  республиканың “60х40” программасы буенча сатып алганнар. Нык итеп эшләнгән һәм карап торышка гади генә күренгән әлеге агрегатның өстенлеге шунда, аның белән юеш, яңгырлы көннәрдә дә ашлык чәчәргә була. Бу бик тә мөһим. Вячеслав Колесов, Евгений Борюшкин, Александр Володин, Александр Тужилкин һәм тырышлыклары белән аерылып торучы башка уңган механизаторлар тырма агрегатларын бүгеннән басуга чыгарырга әзер. Җаваплы чорда шоферлар Виктор Панчугин белән Геннадий Жилковка да эш-мәшәкатьләр җитәрлек.

 

– Язлар хәерлесе белән килсен, җәйләрен шифалы яңгырлар күбрәк яусын, – ди хуҗалык җитәкчесе, – механизаторларыбыз басуларда мул уңыш үстереп алу өчен мөмкин булганнарның барысын да эшләрләр. Яхшы сыйфатлы чәчүлек материалы да җитәрлек күләмдә әзерләп куелган, минерал ашламалар да тупланган. Ягулык-майлау материалларына да кытлык булмаячак, язгы чәчүдә катнашучыларны ашату мәсьәләсе уңай хәл ителгән...

 

Синицин хуҗалыгында язгы-кыр эшләрен тиз һәм оешканлык белән башкарып чыгу өчен барысы да тулысынча әзер. Механизаторлар һәм җаваплы имтиханда катнашачак башка хезмәтчәннәрнең быел да сынатмаячакларына шик юк.  

 

Руслан Хәмидуллин фотолары.