Алдакчылар тозагына эләкмәгез

 

Бу атнада гына да шәһәрдә алдакчылар тозагына эләккән дүрт кеше эчке эшләр органнарына гариза язып тапшырган.

Беренче очракта олы яшьтәге хатын-кыз зыян күргән. Билгесез ир-ат аның өй телефонына шалтырата һәм үзен полиция хезмәткәре дип атый, шуннан соң оныгының юл-транспорт фаҗигасе китереп чыгаруда гаепле булуын хәбәр итә. Проблеманы тиз арада хәл итү өчен утыз мең сум акча кирәк, аны әлеге хатын-кыз курьерга тапшырырга тиеш була. Курьерның автомобиле тыкрыктан борылып китү белән хатын-кыз оныгына шалтырата һәм аның бернинди юл-транспорт фаҗигасенә эләкмәвенә, барысы да тәртиптә булуына төшенә.

 

Шунысын әйтергә кирәк, зыян күргән әлеге хатын-кыз машинаның номерын һәм төсен күреп калган. Бу хакта ул полиция хезмәткәрләренә дә сөйләп биргән.

Калган өч очракта исә алдакчылар нәкъ менә шул ысул белән эш итәргә тырышкан: телефоннан шалтыратканнар, уллары яки оныкларының бәлага таруын әйткәннәр һәм акча сораганнар. Әмма максатларына ирешә алмаганнар: пенсионерларның аларга ышанасы килмәгән яки өйләрендә зур суммада акчалары булмаган.

 

Монда барлык эпизодларның да бер үзенчәлекле ягына игътибар итәргә кирәк: алдакчылар күбрәк тиз ышанучы, нечкә күңелле һәм туганнары арасында ир–атлар булган олы яшьтәге хатын-кызларны сайлаган.

 

Полиция хезмәткәрләре кисәтә: игътибарлы һәм сак булуыгыз, аеруча чит кешеләр белән телефоннан сөйләшкәндә сизгерлегегезне югалтмагыз. Чит номердан шалтыратсалар, трубканы алмагыз, үзләрен полиция яки Дәүләт автоинспекциясе хезмәткәрләре дип таныштырган очракта да сөйләшмәскә тырышыгыз. Мондый очракларда телефоннан 02 номеры буенча Эчке эшләр бүлеге белән элемтәгә кереп тә сезнең өегезгә белгеч җибәрелү–җибәрелмәве турындагы мәгълүматны төгәл итеп ачыклый аласыз. Якыннарыгыз һәм туганнарыгыз белән элемтәгә кереп, аларның кайда булуы, нәрсә эшләве белән кызыксынып торыгыз. Чит-ят кешеләр акча таләп итә башласа, тиз арада полициягә хәбәр итегез. Зыян күрүчеләрдән алынган мәгълүматлар җинаятьчеләрнең эзенә төшәргә ярдәм итәчәк.

 

фото http://dnevniki.ykt.ru/Zhondor_oFF/485072