Спас районы укучысы – мәртәбәле фестиваль дипломанты

Ямбакты авылы мәктәбе укучысы Диләрә Сафина «Созвездие – Йолдызлык» эстрада сәнгатенең ачык республика телевизион яшьләр фестивалендә үзенең яшь төркемендә “вокал-соло” номинациясе дипломанты исемен алды.
Фестивальдә ул тамашачылар һәм жюри игътибарына “Уйна, гармун” һәм “Кыр казлары” дигән җырларны тәкъдим итте. Фестивальнең супер-финалына кадәр алар район күләмендә чыгыш ясадылар, зона туры, финал этабын үттеләр. Диләрә боларны үткән ел ук үткән иде, ә менә супер-финалда призерлар арасына керә алмады. Быел Диләрәгә бәхет елмайды.

– Фестивальнең соңгы этабында мин кырык алтынчы булып чыгыш ясадым. Бу концертның уртасы иде, яки башланып ике сәгать барды дигән сүз. Моңа кадәр шулкадәр тамашачы алдында зур сәхнәдә чыгыш ясаганым юк иде, әлбәттә, бик дулкынландым.

Чирмешәннән Рузилә Булатова һәм Гөлназ Гатина, Аксубайдан Елизавета Гафиатуллиналар белән бер-беребезне тынычландырып, көч биреп тордык. Районнарыбыз данын лаеклы яклаганбыздыр дип беләм, – диде Диләрә.

Фестивальне оештыручылар катнашучылар өчен чын бәйрәм әзерләгәннәр. Чыгыш ясаучылар һәм аларның остазлары өчен бик яхшы күңел ачу программалары төзегәннәр. Алар аквапаркта да, кинотеатрда да булганнар, клубта боулинг уйнаганнар. “Созвездие-Йолдызлык” фестивалендә катнашу онытылмаслык эз калдырган.

Диләрә кечкенәдән үк җырларга яраткан.

– Мин Диләрәне беренче класстан ук беләм,– ди Ямбакты Мәдәният йорты мөдире Рәмзия Насыйрова. – Ул шул вакыттан бирле безнең сәхнәдә барлык чараларда катнашып килде. Җырга сәләте бәлки әтисеннән күчкәндер, ул да матур җырлый. Диләрәнең өченче класста укучы энесе Данис тә матур җырлый...
Аның репертуарында төрле елларда чыккан җырлар бар, нигездә татар милли көйләренә өстенлек бирә. Башкалар кебек ул да ошаткан җырларны Интернеттан эзли. Аннары озак кына репетицияләр үткәрәбез, фонограмманы безнең музыка җитәкчесе Рәдиф Шәфигуллин әзерли. Әгәр үз чыгышына бик тырышып әзерләнмәсә, бу эшкә бик җаваплы карамаса, Диләрә быел бу кадәр зур уңышка ирешә алмас иде...

Остазның сүзләре белән килешмичә булмый. Республика күләмендә уңышлы чыгыш ясарга бары тик табигый талант һәм армый-талмый эшләү генә музыка мәктәбе укучылары һәм профессиональ репетиторлар кул астында шөгыльләнүче яшь җырчылар белән көч сынашырга ярдәм итә. Диләрәнең ноталар өйрәнергә дә, вокаль осталыгын камилләштерергә дә, сәхнә сәнгатен үзләштерергә дә мөмкинлеге булмый. Бездә район үзәгендәге балалар сәнгать мәктәбе алар авылыннан алтмыш чакрым. Әле җырлап кына калмый, үзлегеннән гитарада да уйнарга өйрәнгән.

Тырыш кыз һәр эштә өлгерә. Ул мәктәптә дә гел бишле билгеләренә генә укый, бик актив укучы, кул эшләре остасы, шуңа күрә үз мәктәбендә генә түгел, районда да иң алдынгы укучыларның берсе. Быел Диләрә мәктәпне тәмамлый һәм югары уку йортына керергә җыена. Бәлки үз тормышын музыка белән бәйләр? Ничек кенә булмасын, без Диләрәгә чын күңелдән зур уңышлар телибез.