Даша Чудакова “Созвездие”– “Йолдызлык”та Спас районы исеменнән чыгыш ясый

1 июньдә, Балаларны яклау көнендә, ТР Президенты Рөстәм Миңнеханов “Созвездие-Йолдызлык” эстрада сәнгате ачык телевизион яшьләр фестивале җиңүчеләренә стипендияләр тапшырды.

Яшь талантларга ярдәм итүгә Рөстәм Миңнеханов зур игътибар бирә. 2015 елда инде унбишенче тапкыр үткәрелгән бу фестиваль һәрвакыт аның патронажы астында үтә. Шәһәр дәрәҗәсендә үткәрелә торган яшьләр чарасы буларак башланып киткән фестиваль хәзер Россия дәрәҗәсендәге мөһим мәдәни чарага әверелде. ТР Президенты “Созвездие-Йолдызлык” фестивален Россиядәге иң уңышлы проектларның берсе дип билгеләп үтә.

Иҗат белән шөгыльләнгән, сәхнәгә чыгарга хыялланган яшьләр өчен “Созвездие” фестивале – үз талантларын халыкка күрсәтү өчен менә дигән мөмкинлек.
* * *
Дарья Чудакова тугыз ел рәттән “Созвездие-Йолдызлык” эстрада сәнгатенең ачык республика телевизион яшьләр фестивалендә безнең район исеменнән чыгыш ясый. Быел ул өч тапкыр лауреат булды.

Ирина Телицына

Икенче урыннарны Даша “Вокал-соло”, “Җырга иң яхшы музыка” һәм “Җырның иң яхшы тексты” номинацияләрендә алды. Ә 2011 һәм 2012 елларда ул борынгы Болгарга багышланган җырның иң яхшы текст авторы һәм җырга иң яхшы музыка авторы буларак, фестивальнең җиңүчесе дип табылды. Моннан тыш, ул “Йолдызлык”ның зона этапларында берничә тапкыр җиңеп чыкты һәм призер булды.

Ә бу конкурста ул беренче тапкыр 2007 елда “Минем әкияттәге принцым” җыры белән чыгыш ясады. Зона туры Нурлатта үтте. Яшь җырчыга бу вакытта алты гына яшь була һәм кечкенәләр арасында ул беренче урынны ала. Әлбәттә, бу башкаручының музыкаль иҗатын үстерү өчен беренче адымнар гына була.

Дашаның репертуары төрле-төрле, ә музыканы ул кечкенәдән үк ярата. Бервакыт әнисе аңа балалар җырлары язылган китап сатып алып кайта һәм алар бергәләп җырлый башлыйлар. Акрынлап Даша балалар бакчасында үткәрелә торган бөтен бәйрәмнәрдә катнаша башлый. Мәктәпкә киткәч тә бер генә чара да аның катнашыннан башка үтми. Беренче класстан ук ул җиде ел дәвамында П.И.Чайковский исемендәге 1нче балалар музыка мәктәбендә фортепианода уйнарга өйрәнә һәм мәктәпне бик яхшы билгеләренә генә тәмамлый. Дашага төрле сәхнәләрдә, шул исәптән “Уникс” һәм “Пирамида” концерт залларында чыгыш ясарга туры килә.

Яшь җырчы Санкт-Петербургта үткән “Ак төннәр” Бөтенсоюз конкурсында да катнаша. Ә күптән түгел, опера җырчысы буларак, Бөтенроссия “Морозко” конкурсында чыгыш ясый, конкурс ел саен Казанда С.Сәйдәшев исемендәге Дәүләт зур концерт залында үтә. Жюри рәисе – Россиянең халык артисты Бедрос Киркоров. Бу конкурс турында истәлеккә Дашаның аның белән төшкән фотосы кала. Җырчы кызның Рөстәм Миңнеханов белән төшкән фотолары да бар. Талантлы кыз берничә тапкыр төрле премияләргә лаек булды. Бүләкләре арасында статуэткалар, сувенирлар бар һәм хәтта зәвыклы туннарга кадәр алган. Чәчәкләр турында әйткән дә юк, аларның кайберләрен шунда ук укытучыларына бүләк итә. Дарья “Артек”ка путевка белән дә бүләкләнә.

Сүз дә юк, боларның барысы да истә кала торган, иң күңелле мизгелләр. Ләкин аның өчен иң мөһиме – тамашачылар алдында чыгыш ясау. Аларның рәхмәт хисләре белән сугарылган алкышларын берни белән дә алыштырып булмый. Мондый чыгышлардан соң ул осталыгын тагын да камилләштерергә омтыла. Музыка белән мавыгу белән бергә Дарья мәктәптә дә яхшы укый. Башта ул Казандагы гимназияләрнең берсендә белем алса, үткән ел Казан федераль университеты каршындагы Н.И.Лобачевский исемендәге лицейның тугызынчы классында укый башлады. Даша монда сынатмый, тырышлыгы һәм активлыгы белән аерылып тора. Мәсәлән, ул тикшерү эшләре алып барып, Бөек Җиңүнең 70 еллыгына “Минем бабам Егоров Алексей Петровичның фронтта үткән юлы” дигән язма әзерли, ул шушы уку йорты укытучылар тарафыннан әзерләнгән “Үлемсез полк” дигән җыентыкка кертелә. Ә хәзер Даша имтиханнар тапшыра, ул әлеге лицейда укуын дәвам итү өчен күбрәк балл җыярга тырыша.

– Даша бик тырыш, үз максатына ирешә торган бала, игътибарлы һәм сабыр,– ди дәү әнисе Галина Алексеевна,– музыка белән дә яратып шөгыльләнә, яхшы укый да... Аның уңышларына үзем дә, кызым да бик сөенәбез.

Әлбәттә, әнисе дә, дәү әнисе дә Дарьяның сәләтен һәрьяклы үстерү өчен барысын да эшлиләр. Ул моны бик яхшы аңлый һәм гүзәл музыка дөньясында уңышка ирешергә ярдәм иткән, булышкан һәр кешегә бик рәхмәтле.