Яшел ял итү зоналарына – яшел ут!

Рөстәм Миңнеханов тәкъдиме белән 2015 ел Татарстанда Парклар һәм скверлар елы дип игълан ителде. Бу программа нигезендә яшел ял итү зоналарын реконструкцияләү буенча гаять зур эшләр башкарылачак.

Республика Президенты фикеренчә, паркларны һәм скверларны төзекләндерү кешеләрнең ял итү культурасын үстерәчәк. Монда һәр кешенең күңеленә ошаган шөгыль табарлык шартлар тудырылырга тиеш. Табигатьтә ял итүнең өстенлеген уңайлы көнкүреш шартлары белән берләштергәч, яшел ял итү зоналары җәмәгать тормышы кайнап торган урыннарга әвереләчәк.

Март аенда Рөстәм Миңнехановка республика башкаласының парк зоналарын төзекләндерү проекты тәкъдим ителде. Президент бу идеяләрне хупласа да, реконструкция эшенә керешкәнче, бу турыда халык белән киңәшне призлардан йөкләде. Шәһәрләрдә проектларны ачык тыңлаулар башланды. Барлыгы 2015 елда 160 парк һәм скверны төзекләндерү күздә тотыла. Бу максаттан республика бюджетыннан шәһәр һәм районнарга 1 миллиард сум акча бүлеп биреләчәк. Булган ял итү зоналарын тәртипкә китерү һәм 800 гектар мәйданда яңа яшел ял итү зоналары булдыру күздә тотыла.

Безнең районда яшел ял итү зоналарын реконструкцияләү программасына ике объект – Пионер һәм Хирург Шеронов урамнары чатында урнашкан балалар скверы һәм Болгар музей-тыюлыгындагы Идел буенда яңа утыртылган сквер кертелде. Бу объектларда нинди эшләр алып барылуы турында Болгар шәһәре башкарма комитет җитәкчесе Алексей Тюленев сөйли.

– Республика җитәкчеләренең хәзер ял итү культурасын булдыру турында кайгыртуларын бары тик хупларга гына була. Безнең парк һәм скверларны реконструкцияләү өчен республика бюджетыннан 5100 мең сум акча бүлеп бирелде, эшләр муниципалитет көче белән башкарыла.

Шәһәр балалар скверында төзекләндерү эшләре инде күптән алып барыла. Узган ел монда таган, карусель, таучыклар, эскәмияләр куелды. Сквер территориясен төзекләндерү буенча да эшләр башкарылды. Балачакның яшел утравы булган бу скверда шәһәр кунаклары, балалар белән әниләр ял итәргә ярата, аерча җәйге эссе көннәрдә кеше күп була.

Республика программасы кысаларында, 2015 елда тротуар һәм бордюрлар ясау күздә тотыла, шулай ук уңайлы җәяүле сукмаклар да ясалачак. Моннан тыш, сквер өстәмә яктыртылып, кирәк урыннарда агачлар утыртылачак.

Безнең шәһәр үзәгендәге скверда 2013 елда ук шәһәр Советы депутатлары иске агачларны кисмәскә, ә бары тик куркыныч тудырганнарын алырга дигән карарга килгәннәр иде. Бу скверда халык эссе көннәрдә рәхәтләнеп ял итә. Тиздән ул тагын ямьләнеп, яшелләнеп китәр һәм ул тагын да күбрәк халыкны үзенә тартып торыр. Инде хәзер үк скверда күңелле балалар авазы тынып тормый.

Идел буенда яңа парк утырта башлаганда Татарстанның беренче Президенты, ТР Дәүләт Киңәшчесе Минтимер Шәймиев тә катнашты. Паркта да эшләр алдан төзелгән график буенча алып барыла. Хәзерге вакытта ярларны ныгытып, уйсу җирләрне туфрак белән тигезлиләр. Аннары шушы урында җәяүлеләр сукмагы, агачлар утыртылган скверлар барлыкка киләчәк.

Узган елның җәй ахырында һәм көз башында халык җыеннарында район торак пунктларын төзекләндерү, шул исәптән күлләр, буалар, паркларны тәртипкә китерүгә кагылган мәсьәләләр буенча фикер алышулар уздырылды. Монда, әлбәттә, кешеләрнең тәкъдимнәре исәпкә алынды.

Күптән түгел Татарстан Президенты Рөстәм Миңнеханов беренче нигез ташын салган кунакханә комплексы территориясендә дә агачлар утырту, аның янындагы күлне тәртипкә китерү күздә тотыла.

Рабига күле буйларын тәртипкә китерү эше дә тулы көч белән бара. Эшнең беренче этабы инде төгәлләнеп килә, тиздән шәһәр халкының яраткан ял итү урыны тагын да ямьләнеп, матурланып китәр.

Кайбер эшмәкәрләр инициативасы буенча шәһәрдәге урамнарны тәртипкә китерү эше алып барылуын да билгеләп үтәсем килә. Мәсәлән, Антон, Гордеев урамнарында, Өчкүл, Кузнечиха һәм башка авылларда менә дигән балалар мәйданчыклары барлыкка килде. Узган ел ял итү зонасы белән берләштерелгән “Дубки” спорт мәйданчыгы эшли башлады. Аны шәһәргә Татарстан Республикасы Дәүләт Думасы депутаты, “Алексеевскдорстрой” ААҖ генераль директоры Фоат Вәлиев бүләк итте.