Чыгышлары үзенчәлекле, мавыктыргыч булды

Күптән түгел район Мәдәният йорты сәхнәсендә санаторий мәктәп-интернат коллективы отчет концерты белән чыгыш ясады.

Гадәттә, нинди дә булса бәйрәмгә, истәлекле датага багышланган концертлардан без шул темага багышланган чыгышлар көтәбез.

Ә менә санаторий мәктәбе коллективының чыгышы үзенчәлекле булды. Концерт программасы Көлке көненә туры килә торган итеп төзелгән иде, шунлыктан юмористик номерлар, мәзәкләр күп булды.

Концерт башлануга ук залда утырган берничә кеше мәзәк призларга ия булды. Бүләкләр зур булмаса да, барыбер кеше күңелен күтәреп җибәрде.

Аннары “Коммуналь фатир” дигән тамаша башланып китте. Мондый фатирда тормышның ничек баруын һәркем яхшы белә: бетмәс-төкәнмәс низаглар, бәхәсләр бер-берсенә ярдәмчеллек хисе, авыр минутларда ярдәмгә килү омтылышы белән үрелеп бара. Санаторий мәктәбе үзешчәннәре дә моны үзләре куйган тамашада ачык күрсәттеләр.

Венера һәм Сергей Журавлевлар, Галина Бухалова, Гүзәл Сәгыйрова һәм бөтен җиргә өлгерүче Бибинур апа ролендәге Гөлчирә Галимова башкаруындагы персонажлар “коммуналка”да яшәүчеләрнең тормышын көлкеле дә, җитди дә итеп күрсәтә белделәр. Тамаша күренешләре музыкаль номерлар белән үрелеп барды.

Агата Спирькова, Марина Игнатьева, Николай Еликов, Ирина Прокофьева, Ксения Колчина, Анастасия Артюшина, “Сеспель” ансамбле, укытучылар хоры башкаруындагы җырларны тамашачылар кайнар алкышларга күмде. Концертта рус, татар һәм чуаш телендә җырлар яңгырады. Татар халык, моряк биюләре, “Кадриль” беркемне битараф калдырмады.

Безнең тормышта хәзер бик сирәк була торган мәзәк, уен-көлке белән ике сәгать вакытның үтеп китүе сизелми дә калды. Шулай итеп, күптән түгел үзенең ярты гасырлык юбилеен билгеләп үткән санаторий мәктәп коллективы эшли дә, башкаларга күңел күтәренкелеге бүләк итеп, күңелле ял да итә белә.

– Бу коллективның отчет концертын без махсус Көлке көненә туры китереп сайладык, – диде район башкарма комитеты җитәкчесе урынбасары Елена Афоньшина, тамашачылар алдындагы чыгышында. – Аларның иҗади мөмкинлекләре зур икәнен беләбез. Юмор, уен-көлке, күтәренке кәеф бүләк итүегез өчен рәхмәт сезгә!

Район Мәдәният йортында булган тамашаларның берсен дә калдырмыйча йөргән бер ханым да үз фикерен әйтте.

– Коллективның чыгышы бик ошады, – диде ул. – Дөресен әйткәндә, концерт шундый кызыклы, үзенчәлекле булыр дип көтмәгән идем. Артистлар безгә рәхәтләнеп көләргә, дөнья мәшәкатьләрен онытып торырга ярдәм итте...

Гадәттә, уен-көлке яшәгән, дустанә мөнәсәбәтләр хөкем сөргән коллективта эшләр дә гөрләп бара...