Мәргәннәр төз ата

Олимпия резервының республика мәктәбе тренеры Александр Татиевский шәкертләре берничә ярышта катнашып, әйбәт нәтиҗәләргә ирештеләр.

Советлар Союзы Герое Борис Кузнецов призына ел саен оештырылучы ярыш Татарстан Республикасы ДОСААФы тирында үтте. Республиканың 40 районыннан килгән 120 спортчы арасыннан кечкенә калибрлы коралдан иң төз атучылар ачыкланды. Энже Әхмәтҗанова, Кристина Баландина һәм Екатерина Давыдова призлы урыннарга эләгә алмасалар да, күп көндәшләреннән өстен чыктылар. Артем Елатин шәхси беренчелектә җиденче урынга лаек булды.

Аннары Мирный поселогындагы “Динамо” спорт базасында полиатлон (спортның кышкы өч төре) буенча Татарстан Республикасы чемпионаты һәм беренчелеге, шулай ук генерал-майор Фатыйх Булатов истәлегенә багышланган Бөтенроссия физкультура-спорт комплексының “Хезмәт һәм оборонага әзер бул!” тест фестивале узды. Республиканың 19 командасыннан 90 спортчы килгән иде. Программага пневматик коралдан ату, гимнастика, тартылу, отжимание кертелгән иде. Безнең спортчылар атуда иң яхшы нәтиҗәләргә ирешеп, командалар арасында беренче урынны алды. Үз яшендәге спортчылар арасында Энҗе Әхмәтҗанова җиңүче булды, Артем Елатин белән Юрий Шишкин икенче урынны алдылар, Кристина Баландина дүртенче урында калды.
Кызганыч, спортның башка төрләре буенча безнең спортчыларның әзерлеге түбән иде, шунлыктан алар иң яхшы унлыкка да эләгә алмадылар.

Мирный поселогында пуля белән ату буенча республика чемпионаты һәм беренчелеге, шулай ук Татарстан кубогының беренче этабы бәйгесе дә спортчылардан зур җаваплылык таләп итте. Биредә пистолеттан атуда бертуган Столяровлар иң яхшы нәтиҗәгә иреште. Беренчелектә Роман алтын медаль алды, Семен исә икенче урынга чыкты. Татарстан Кубогы бәйгесендә исә Семен беренче булды, Роман бронза медаль алды. Артем Елатинга винтовкадан ату беренчелегендә бронза медаль тапшырылды. Кубок өчен көрәшнең беренче этабында Артем Елатин, Энҗе Әхмәтҗанова, Юрий Шишкин һәм Денис Пеньковка призлы урыннарга чыгу өчен бераз гына очколары җитеп бетмәде. Татарстан Кубогының икенче һәм өченче этабы апрель һәм май айларында үтәргә тиеш, ярыш нәтиҗәләре буенча республика җыелма командасы тупланачак. Бу команда Глазов шәһәрендә Россиянең иң төз мәргәннәре көч сынашачак ярышларда катнашырга тиеш.

Безнең спортчылар ирешкән уңышларда аларның остазы Александр Татиевскийның өлеше зур. Узган елның сентябреннән башлап ул рәсми рәвештә республиканың махсус балалар–яшүсмерләр Олимпия резервы мәктәбе тренеры–укытучысы итеп билгеләнде. Әлеге мәктәптә әзерләнгән спортчылар арасыннан күп тапкыр дөнья чемпионы булган һәм Олимпия уеннарында призлы урын алган Светлана Демина белән өч тапкыр дөнья чемпионы Василий Мосинны билгеләп үтәргә мөмкин. Безнең кызлар һәм малайлар арасыннан да киләчәктә өметле спортчылар чыгачагына шик юк.