“Безнең республика: горурланабыз һәм яратабыз”

Әнә шундый исем белән игълан ителгән бөтенреспублика конкурсында теләге булган һәр кеше катнаша ала. Конкурска 9 июльдә старт бирелде һәм ул август азакларына кадәр дәвам итәчәк.
Конкурсның темасы – хезмәт һәм гаилә кыйммәтләре, аны уздыру идеясе белән Татарстан Президенты Рөстәм Миңнеханов чыкты. Ул социаль челтәрләрдә #нашареспублика билгесе астында хезмәт ветераннарының фоторәсемнәрен урнаштырган.
Татарстан Республикасының балалар сәламәтләндерү-белем бирү Үзәге һәм республиканың “Кадрлар резервы” хәрәкәте вәкилләре фотоконкурс уздыру инициативасы белән чыккан. Конкурста районнардагы “Яшь гвардия” һәм “Бердәм Россия” оешмалары да катнашырга теләк белдергән.
Конкурсның төп номинацияләре – “Иң күп сандагы “лайк” һәм “ретвитлар”, “Иң оригиналь фото”, “Иң яхшы аңлатма”. Моннан тыш, конкурска #нашареспублика билгесе белән иң күп фотоэшләр җибәрүчеләр җиңүче булачак. Фотоэшләрдә хезмәт, гаилә, республика, дуслык темасы чагылдырылырга тиеш. Фоторәсемнәрне һәм аларга аңлатмаларны fototatarstan@mail.ru электрон адресына җибәрергә.
Җиңүчеләргә һәм призерларга мактау дипломнары һәм кыйммәтле бүләкләр тапшырылачак.